قصة الارنب الغضبان بصورة زجلية للأطفال (بقلمى)

السلام عليكم ورحمة الله وبركاته
القصة الثالثة للأطفال 
وهى بعنوان
(الأرنب الغضبان)
أرنب أبيض زى الفل
صابح يفطر زى الكل
نادى على مامته 
تجيب له فطوره
أول ما الصبح هل نوره
ماما ياماما أنا جعت
هاتى لى فطارى 
ياترى هاكل إيه النهاردة؟
قولى ياماما غلب حمارى
ضحكت مامته وقالت له
يعنى هتفطر إيه ياحبيبى
هو فطارك المعتاد
خس وجزر 
زعل الأرنب وكمان كشر
بتقولى إيه؟
خس وجزر
يوووووووووووووووووووووووووووه
هو كل يوم خس وجزر
مش معقول
أنا غضبان أنا زهقان
عايز أغير
أنا متحير
وخرج من البيت زعلان
ومشى بسرعة لوحده 
فات على كل الجيران
يمكن يلاقى حاجة ياكلها 
تسد جوعه 
أول ماشاف شاف القطة
بتشرب لبنها وجالها زغطة
قال لنفسه
لا لا لا
لبن القطة ماينفعنيش
ولايمكن بيه أنا أعيش
ومشى من تانى 
شاف بطة بتنط النطة
ومامتها جايبة لها الشنطة
فيها حب وغلة وقمح
قال ده لايمكن
أنا مقدرش آكل من ده
ومشى وهو جعان ع الآخر
شاف الكلب بياكل عضمة
قاله تعال خد لك حتة
قال متشكر
ده ماينفعش
راح على بيته بعد ماتاب
وعرف إنه مالوش غير أكله
هو اللى ربنا حلاه
جوة بقه وهو غذاه
صالح مامته وباسها كمان
وإتأسف لها وقال لها
سامحينى ياماما
أنا غلطان
حضنته مامته وباست قورته
وقالت له
طب يلا قوام
أكلك جوة مستنيك
خس وجزر طعمه جنان
وبالهنا والشفا يا أرنوبى
يا إبنى يالذيذ ياحبوبى